Para estar o día das nosas actividades a partires de agora podes seguirnos :

Canal de YouTube
https://www.youtube.com/user/teatrobadius

Perfil de Facebook:

https://www.facebook.com/teatro.badius

E- mail Contacto: teatrobadius@yahoo.es

martes, 13 de enero de 2015

Historia de badius (III): 2005-2014

Para rematar xa coa nosa historia de Badius imos co percorrido polo último decenio. No ano 2005 segue a representar Tócama, Sam por diversas localidades da provincia, coma sempre en convenio coa Deputación e a Xunta. No 2006, e despois dunha forte renovación, comeza a preparar unha nova comedia, baseada nun clásico do cine dos anos 40: Arsénico por compasión e que o grupo titula Veleno por caridade, dándolle un aire máis moderno. Esta obra, que se estrea no verán, ten moi boa acollida e grazas ao convenio coa Deputación e a outras chamadas, fanse en só tres meses catorce representacións. En colaboración co IES Maximino Romero de Baio créase unha sección xuvenil coa que se fan varias representacións e se acode ao certame de Teatro Intercentros de A Coruña, acadando un primeiro premio de interpretación feminina (Rebeca Facal Fuentes). No mes de decembro a asociación Badius intégrase na FABA (Federación de Asociacións de Baio) para organizar o Nadal Cultural na vila.
No ano 2007 séguese coa obra Veleno por caridade, da que se grava un vídeo, e a agrupación participa en varias mostras de teatro coma as de Vedra, Bertamiráns e Salceda de Caselas (Pontevedra), nesta última froito do recente ingreso de Badius na Fegatea (Federación Galega de Teatro Afeccionado). Novamente en decembro, organiza coa FABA o segundo Nadal Cultural.
No 2008 hai unha nova renovación do grupo ao producirse varias baixas polos estudos ou o traballo dalgúns membros. As baixas son cubertas na súa totalidade por actrices e actores procedentes da sección xuvenil. Comézase a preparación dunha nova obra: Bancagare. Sucursal n.º 13, cuxo guión está baseado no clásico do cine español dos 60 Atraco ás tres, xunto con achegas de membros do propio grupo. O resultado é unha comedia sobre o mundo da banca que é estreada en Ferrol o 19 de outubro con grande éxito e que se segue a representar por diversos escenarios (O Ézaro-Dumbría, Padrón, Luou-Teo, Rois, Lousame...). Badius participa tamén no terceiro Nadal Cultural da FABA.
Premios
As representacións de Bancagare proseguen no 2009. É estreada en Baio e levada aos escenarios de Rianxo, As Pontes, O Couto, Sada, A Laracha e Mazaricos, entre outros lugares. Tamén participa no concurso de grupos afeccionados organizado polo colexio Calvo Sotelo de A Coruña, que patrocina a Deputación. Nel, o actor Marco Álvarez consegue o primeiro premio de interpretación masculina. A finais de ano comézanse a organizar os actos do 25.º aniversario do grupo, que teñen lugar durante tres domingos de decembro e xaneiro no marco dun novo Nadal Cultural. No primeiro actúan os grupos do Banco de Tempo do Concello de Zas e o Grupo Trécola de Santa Comba. No segundo, os actos propiamente ditos de aniversario (un percorrido audiovisual pola historia do grupo, sketchs cómicos, presentación dun vídeo e unha canción e entrega de diplomas conmemorativos). E no terceiro, a reestrea de Xoo... ante o perigo.
No 2010 séguense a representar as obras Bancagare e Xoo... ante o perigo. Con esta particípase nos concursos de teatro de Sada (logrando o primeiro premio de Interpretación Masculina: Xurxo Sánchez) e no 13.º Certame de Teatro Intercentros de A Coruña. Tamén participa nas Letras Galegas do Couto, no día dedicado á vila de Baio e actúa en Ons-Brión (para a Fegatea), Padrón, Ferrol (Domingos a Escena), Zas... e coma sempre, no Nadal Cultural da FABA, que ese ano alcanza xa a súa quinta edición. Neste caso Badius colabora organizando un Festival do Humor no que se representan diversos sketchs cómicos: dende algún sobre as orixes de Badius, pasando por Les Luthiers ou Tricicle, unhas propostas que sen dúbida sorprenderon ao público.
O 2011 comeza co Festival do Humor e séguense a representar Bancagare e Xoo... ante o perigo, coas que un ano máis participa no convenio da Deputación. Estas obras represéntanse en Dumbría, Rois, Agualada, A Coruña, Santiago e Cee. Tamén acode a Vimianzo. E en decembro toma parte no sexto Nadal Cultural da FABA.
O 2012 empeza coa representación de Bancagare no Festival Teatral do Nadal. Logo, a compañía comeza a preparar Facer o sueco, baseada nun texto do catalán Luís Coquard, coa que participa no convenio da Deputación. Trala preestrea do mes de setembro en Baio visita Ons, Lañas e Vimianzo. Outras actuacións son en O Couto e Zas e en decembro forma parte dos actos dun novo Nadal Cultural da FABA
As representación de Facer o sueco seguen no 2013 e a compañía prepara o sainete descuberto de Labarta Pose, Unha boa misa, que se estrea nas Letras Galegas en Baio. En maio acode ao concurso Calvo Sotelo, no que acada o primeiro premio de interpretación masculina (Marco Álvarez) e tamén actúa en Laxe, Padrón e Malpica. Xa no Nadal, e de novo coa FABA, a compañía anuncia a estrea da versión 3D de Facer o sueco con motivo do Día dos Santos Inocentes e bromea co público repartíndolle unhas gafas para ver o suposto efecto.
Ano sabático e nova obra
E chegamos así ao ano 2014, no que o grupo toma un ano sabático en canto a actuacións para preparar un novo espectáculo co que intentar sorprender despois destes 30 anos de existencia. O guión baséase no filme de Mel Brooks O xovencito Frankenstein, pero co toque persoal e Badius e retomando o título orixinal do libro de Mary Shelley, Frankenstein, cuxo estreo, está programado dentro dos actos do seu trixésimo aniversario, realizados polas Escolas Municipais de Teatro Infantil e de Adultos do Concello de Zas coa colaboración das seccións de baile, gaita e pandeireta de Adro e no marco do Nadal Cultural da FABA. Pero a repentina enfermidade dunha das actrices obriga a aprazar a súa estrea, que, probablemente, se realizará durante o próximo entroido para marcar así un novo fito na súa traxectoria.

martes, 6 de enero de 2015

 Historia de badius (II): 1994-2004

Continuando coa historia de Badius, en 1994 a compañía teatral nacida en Baio un decenio antes acode a varias mostras de teatro como as de Luou-Teo, A Baña e Ferrol. A obra que representan ese ano é O avarento e recupera ademais con motivo do seu décimo aniversario a súa primeira obra longa, O menciñeiro á forza.
No 1995 celebra esa onomástica co Festival X Aniversario no que ofrece unha antoloxía de fragmentos das mellores obras, unha exposición fotográfica e outros actos diversos. Tamén se organiza, xunto coa asociación cultural Adro? a Lembranza de Labarta Pose, con motivo do 70.º cabodano da súa morte, representando varias obras curtas preparadas a partir de contos deste escritor baiés (O segredo do tío Sanfona e O tío Miseria). A finais dese ano estrea Cargar co morto, de Alfonso Paso, quizais a obra de máis grande éxito do grupo ata o de entón.
En 1996 créase unha nova sección xuvenil con alumnos do instituto Maximino Romero Lema de Baio. Particípase no certame de Teatro Xuventude 96 de Lugo, organizado pola Consellería de Xuventude e no que Badius acada o terceiro premio coa obra Cargar co morto. Tamén edita xunto a Adro a revista cultural A Fiestra. E para rematar o ano toma parte no primeiro Encontro de Teatro da Costa da Morte, que con outros grupos da bisbarra se celebra en Camariñas no mes de decembro de 1996.
No 97 estrea Eu non fun, tamén de Alfonso Paso, obra continuísta na liña de Cargar co morto e que serve de ponte ata o 98 mentres se prepara ¡Xoo... ante o perigo!, texto elaborado polo propio grupo sobre a película Só ante o perigo e que será estreado no Pavillón Cultural da Costa da Morte, que se celebra en Cabana no mes de setembro organizado pola asociación Neria. Esta obra -unha das que o grupo se sente máis satisfeito- será representada ao longo de 1999 e con ela acudira ao primeiro Concurso de Teatro Afeccionado de Gondomar, no que Badius consegue o terceiro premio á mellor obra e dous accésits (mellor escenificación e mellor son). Tamén neste ano 99 colabora nos actos do 25.º aniversario do colexio Labarta Pose e celebrase o 15.º aniversario do propio grupo con actos que inclúen unha mostra de teatro afeccionado e profesional cos grupos como Mofa e Befa, Talía, Teatro do Improvisto, Amistad e Badius, ademais dunha mostra de teatro infantil con formacións de Cabana, Nantón, O Couto e Baio, e unha exposición de fotos e recordos do grupo ao longo deses 15 anos. 

Implicación cultural 

No ano 2000 estrease Unha de Romanos, sobre un texto de Manuel Núñez Singala. Colabora tamén coa comisión Labarta Pose para que se lle dedique a este escritor baiés as Letras Galegas e participa nos actos conmemorativos do 20.º aniversario da asociación cultural Adro. Nos anos 2001 e 2002 prosegue coas representación de Unha de Romanos.
No ano 2003 prepara unha nova obra, que se titula Tócama, Sam. Está baseada no guión de Casablanca e é a peculiar visión que o grupo ten deste mítico filme, pero visto dende a óptica do humor. Foi estreada en Vimianzo no mes de novembro e logo sería representada nas localidades de Ponteceso (Mostra de Teatro), Zas e Baio.
No 2004 liquídase a asociación xuvenil Badius para dar paso á asociación cultural teatral Badius. A finais dese ano cúmprese o vixésimo aniversario do grupo que é celebrado cunha mostra de teatro afeccionado e profesional como xa é tradición na entidade cando toca conmemorar unha efeméride. Póñense en escena obras de Falcatruada, Títeres Cachirulo, Candelexas e Badius. Tamén se organiza unha cea para celebrar dito aniversario e nela actúa o dúo humorístico Chapapote.

Historia de badius (I): 1984-1993   
https://www.youtube.com/watch?v=b1-yKFbUG8w

O grupo de teatro Badius xorde, aínda sen esa denominación, a finais de 1984 cando varios membros da directiva da asociación cultural Adro -fundada en 1980-, deciden organizar unha sección teatral. Pero non se pode dicir que esas inquietudes foran unha novidade. Eran máis ben o froito de sementes anteriores, a herdanza dunha tradición teatral que arrinca nos anos 50 cando o crego Juan Astray Vidal, pola festa de María Goretti, cos rapaces que facían a Primeira Comuñón ( a festa era e segue a ser en Baio a sinalada para tal celebración) preparaba unha serie de declamacións de tipo relixioso como poesías á Virxe. Así mesmo outros rapaces e rapazas das escolas Agra Regueiro representaban chistes, sainetes e pequenas pezas cómicas que ensaiaban cos mestres Antonio Platas e Carmen González.
Logo, nos anos 70 e co gallo de recadar fondos para as festas patronais, José Rojo Valiña organiza varios festivais teatrais, sempre a base de sainetes e pezas cómicas, moitos deles orixinais. Nestas representacións actuaban mozos e mozas do pobo, algúns deles consumados actores e actrices. Quen non lembra as falcatruadas de Andrés de Pascua, ou a Manolito da Droguería, Otilia de Gómez, Maricarme de Xan de Rosa, Pérez... José Rojo, sen dúbida un dos artífices do teatro en Baio, aínda volvería nos anos 80 con dúas citas teatrais: as escenificacións dun belén vivinte e da Paixón, ámbalas dúas organizadas por Adro.
Xa en 1984, a primeira actividade de Badius foi a organización do Festival Teatral do Nadal. Nel represéntanse diversas pezas curtas populares, xa coñecidas de moitos por representarse hai anos. Na segunda edición tamén representan pequenas obras e estrean o texto de Molière, O menciñeiro á forza, obra fundamental na historia do grupo, porque vai significar o seu lanzamento definitivo e será representada en varias localidades durante 1986. 

Primeiros premios 

Ademais, Badius acudirá con ela ao primeiro Certame de Teatro Xuvenil Ataroa da Coruña, no que se conseguirá o primeiro premio ao mellor grupo e obra, o primeiro premio de interpretación masculina (Manuel Muíño) e un accésit de interpretación (Gloria Regaldie). No seu terceiro Festival Teatral do Nadal representarán varias obras de autores galegos e algunha do propio grupo e a finais tamén dese ano será cando se produce a escisión de Adro e a constitución da asociación xuvenil Badius.
Na primavera do 87 a agrupación estrea O enfermo de neura, orixinal de Molière, e participa novamente no certame Ataroa. Nesta ocasión consegue o segundo premio á mellor obra e o primeiro de interpretación feminina (Gloria Regaldie). Dita obra será logo representada en moitas localidades da provincia (Zas, Vimianzo, Laxe, A Coruña, Oza, Malpica, Buño, Cee, Baio, Carballo, Ponteceso, Padrón, Santa Comba, Esteiro, etcétera), pero quizais a actuación máis sobresaínte do ano é a levada a cabo en outono cando o grupo viaxa a Mallorca, invitado polo Pueblo Español desta illa, para facer dúas representacións. Unha vez máis polo Nadal, organízase o seu festival teatral, que nesta ocasión serve para homenaxear ao pobo de Baio polo apoio que en xeral sempre prestou ao grupo dende os seus comezos. Son dous días de teatro nos que se representan as obras de máis éxito do grupo e se estrea Taberna sen dono, de Varela Buxán, moi ben acollida polo. Con ela acudirase durante o ano 88 a varias mostras de teatro (A Coruña, Rianxo, Cee) e a diversas localidades. Comeza ese ano o Certame de Teatro Afeccionado Tramoia en colaboración coa asociación cultural. Castro-Meda de Zas, con seis grupos participantes e no gañará o Grupo de Teatro Ártabro de Carballo. A finais de ano organízase coma decote o festival de Nadal.
No ano 89 continúase co certame Tramoia, xa con 20 grupos, repartidos en dúas seccións: infantil e xuvenil. Badius estrea a obra O Calzurras, adaptación libre dun texto de Carlos Arniches e participa en diversas mostras e encontros de teatro. Tamén se crean, respondendo a unha evidente necesidade, a sección infantil de teatro, en colaboración co colexio Labarta Pose e que agrupaba a máis de 50 nenos, e a sección xuvenil como ponte de enlace entre a escola e o propio grupo.
É de destacar a importancia do teatro infantil, pois grazas ao traballo de varios mestras e mestres que se encargaban do teatro escolar, este pasa a ser case a única actividade extra escolar do centro, organizándose durante moitos anos (aínda seguen na actualidade) festivais teatrais aos que acode gran cantidade de público para ver a estes actores novos (participan xa dende os tres anos). Incluso nalgunhas ocasións vaise actuar fóra do pobo a concursos ou mostras de teatro infantil. É aquela, a de finais dos 80, unha época dourada do teatro en Baio, pois entre as tres seccións houbo neses momentos preto de cen persoas relacionadas con esta arte escénica.
O labor de Badius continúa nos anos 90 dun xeito semellante ao desenvolvido ata entón, destacando feitos como a participación na terceira edición do certame Tramoia (1990) con 24 obras a concurso; ou a xira a Suíza realizada no 91 en colaboración coa Federación de Centros Galegos, para facer representacións en Xenebra, Lucerna, Zürich e Zug. Escenificouse con gran éxito Taberna sen dono. Tamén nese ano celébrase a cuarta Mostra de Teatro Tramoia, que desaparecerá tras esa edición por falta de apoio institucional.
En 1992 a compañía estrea O Avarento, de Molière e en 1993 participa no Couto na celebración do Día das Letras Galegas, dedicado a Blanco Amor, polo que se representan as obras A lebre das ánimas e A tía lambida.

miércoles, 6 de junio de 2012

viernes, 6 de febrero de 2009

Queridos amigos, próximamente actuaremos en Baio, será para nós un motivo de ledicia especial, volver a actuar co noso compañeiro Pibe. Ánimo, todos estamos contigo.


martes, 16 de diciembre de 2008


O sábado 6 de decembro actuamos na Agualada (Coristanco). Ao rematar a actuación quixemos gravar unha panxoliña dedicada aos nosos seguidores, pero problemas técnicos impídennos amosala en todo o seu esplendor. Para compensar aí tendes a foto de todo o grupo que a pesar de todo vos desexa un FELIZ NADAL!!!!!!!!!!!!!!